2021ean beste modu batean gozatzeko aukera

06 Ekaina 2021

Gaurkoa izango zen 2021eko Zegama-Aizkorri egiteko aukeratu genuen eguna, baina horren ordez udan zehar egingo dugun ekimenaren berri eman nahi dugu. Uda honetan Zegama beste modu batean gozatzeko aukera emango dizuegu!

2021eko Ekainaren 6a, hau zen aurtengo Zegama-Aizkorri mendi maratoia egiteko jarri genuen data. Asteburu hau izango zen herria jendez, kolorez eta biziz beteko litzatekeen asteburua. Martxoaren 30ean jakinarazi genuen bezala, aurtengoan ere, osasun egoera kontuan hartuta, ez ospatzea erabaki genuen.

Mezu hura ordea “uste baina lehenago ikusiko dugu elkar!” esanez agurtu genuen. Eta iritsi da hilabete guzti hauetan eskuartean izan dugun ekimena aurkezteko garaia.

2021ean ezin izango da lasterketaren esperientzia bizi, baina Zegaman korrika egin eta lehiatzearen zirrara bizi ahal izango da!

Uda honetan Zegama itzuliko da! Bai, ongi irakurri duzu, beste modu batean baina Zegama itzuliko da. OTR aplikazioari esker egunero korrikalari batzuek dortsala jantzi eta maratoiaren 42 kmak jarraian edo 4 zatitan egin ahalko dute. Hemendik gutxira zabalduko dugu udako ekimen berezi honen informazio osatuagoa.

Hurrengo hilabeteetan beraz, elkar ikusteko aukera izango dugu!