• Hasiera
  • Albisteak
  • Zegama-Aizkorrik arrakastaz itxi du bere ediziorik ezberdinena

Zegama-Aizkorrik arrakastaz itxi du bere ediziorik ezberdinena

Uztailaren 1etik irailaren 30era bitartean, 570 pertsonak eman zuten izena proban, eta 340 sartu ziren Open Trail Races-en sailkapenean. 200 erabiltzaile baino gehiagok parte hartu zuten Strava-ko erronkan Sancti Spirituko segmentua ahalik eta azkarren igoz.

Zegama Zegama izan zen, oraingoan edizio ezberdin bat izan bazen ere. Mendiko proba mitikoa 2021eko ekainaren 6ko asteburuan egitea aurreikusita zegoen, baina bertan behera geratu zen osasun agintarien gomendioen ondorioz, antolatzaileek ordea alternatiba bat asmatu zuten proba horren izpiritua bere horretan mantentzeko.

340 “finishers”
Zegama-Aizkorri lasterketak 90 egun iraun zuen. Uztailaren 1etik irailaren 30era bitartean, 572 korrikalari joan ziren Zegamako Kultur Etxera lasterkariaren dortsala eta poltsa jasotzera, ezohiko proba batean parte hartzeko. Horietatik, 340 parte-hartzailek osatu zuten proba, ekinaldi bakarrean edo lau zatitan, eta Open Trail Races aplikazioaren bidez sartu ziren sailkapen ofizialean.

42 kilometroko eta 5.472 metroko desnibel positiboko lasterketa ezin izan da bigarren urtez, modu konbentzionalean egin. 2020an lasterketa birtualki jokatu zen, 12.000 parte-hartzaile baino gehiagorekin, osasun-larrialdiaren ondorioz, eta, edizio honetan, aurrez aurre lehiatzeko aukera bat aurkitu zen.

“Parte-hartzaile askok urteak zeramatzaten aurre-izenematea eginez eta ez zitzaien inoiz dortsalik egokitu, aukera hau ematerakoan oso eskertuta zeuden. Ikusi dugu jendea ez dela bakarrik etorri maratoia lasterketa moduan egitera. Batzuentzat, inguru hau sakonago ezagutzeko behar zuten pizgarria izan da, dagoeneko hain ospetsuak diren puntu guztietatik igaroz”, zioten antolakuntzako kideek.

Uztaila eta iraila bitartean, parte-hartzaileek maratoi osoa korritzeko edo proposatutako lau etapetako bat egiteko aukera izan zuten: Zegama-Otzaurte (0 km - 7 km), Otzaurte - St Spiritu (7 km - 20 km), St Spiritu - Moano (20 km – 34km) eta Moano - Zegama (34 km - 42 km). Hori bai, ikusleen ohiko animoak jaso gabe egin zuten, baina lasterketaren espiritu lehiakor berarekin, Open Trail Races-ek garatutako teknologiari esker.

Horrela, gizonezkoetan Zorion Barandiaran herritarra izan zen lasterkari guztien artean azkarrena 5h07 '39 "ko denborarekin eta Ana Ramos, 7h45 '37" -ko denborarekin emakumeen artean onena izan zen. Halaber, partehartzaile guztien artean 13.733 kilometro egin zituzten eta 881.935 metroko desnibel positiboa pilatu zuten. Edo, bestela esanda, parte-hartzaile guztien artean 100 bat aldiz igo zuten Everest.

Sancti Spirituk jauzi egin du Strava-ra
Sancti Spiritu da maratoiko ibilbideko punturik esanguratsuenetako bat. Bataz beste % 30eko malda duen igoera batean zehar korrikalariak txalotzen eta animatzen dituen zale-ilara da lasterketako irudirik ikonikoenetako bat.

Uda honetan, mendiko lasterketetako munduko segmenturik mitikoena inoiz baino esnatuago egon zen. Uztailaren 15etik abuztuaren 15era bitartean, Stravak eta Zegama-Aizkorriko antolakuntzak mendi maratoiko segmentu berezieneko 180 metroak ahalik eta azkarren igotzeko gonbita egin zieten mendizale guztiei

211 lagunen hankek erronka onartu zuten. 180 metroak egiten azkarrena Carlos Jiménez izan zen. Hiru saiakera behar izan zituen 57 metroko desnibel positiboa lortzeko 58 segundotan. Aiara Garaialdek hogeigarren postuan bukatu zuen. Laugarren saiakeran, korrikalari euskaldun honek minutu bat eta 39 segundoan gelditu zuen kronometroa eta erronka onartu zuten 26 emakumeetatik azkarrena bihurtu zen.

Hurrengo ediziorako atzera-kontaketa
Pandemiaren mugek markatutako urtean ere, zifrek erakusten dute Zegama Aizkorri lasterketa berezia dela trail zale amorratuentzat. Ez bakarrik bere ibilbide ikusgarriagatik, baita Euskal Herriko herri honetako biztanleek proba honen espiritua gal ez dadin duten grinagatik ere. Irailaren 30ean amaiera eman zitzaion edizio ezberdin bati, baina atzera-kontaketa hasi da datorren urterako, eta antolatzaileek normaltasun osoz ospatu ahal izatea espero dute.

 

Antolatzaileak

Babesle Nagusiak

Beste Babesleak