Araudia


1.Data eta lekua: Hamaseigarren Zegama-Aizkorri Mendi Maratoia maiatzeko laugarren igandean ospatuko da Zegaman (Gipuzkoa). Hamaseigarren edizio hau 2017ko maiatzaren 28an ospatuko da, irteera goizeko 9:00etan izango delarik.

2. Ibilbidea: Proba, Aizkorri mendizerraren bi isurietatik iragaten da. 42,195 kilometroko luzera du eta metatutako desnibela 5.472 metrokoa da. Neurketak EMFko eta FEDMEko teknikariek homologatu dituzte.

3.Puntuagarria: Hamaseigarren edizio honetan Skyrunner World Series 2017rako puntuagarria izango da.

4.Partehartzea: 18 urtetik gorako atleta, mendizale eta kirolari guztiek dute proban parte hartzeko aukera, arautegi honetan adierazitako guztia onartu eta zehaztutako baldintza guztiak betetzen badituzte behintzat.

5. Mailak: (proba ospatzen den egunean duten adina)

Gizonezkoen maila

Seniorrak: 18-40 urte bitartekoak
Beteranoak: 40 urtetik gorakoak

Emakumezkoen maila:

Seniorrak: 18-40 urte bitartekoak
Beteranak: 40 urtetik gorakoak

6. Izen-ematea: Aurre-inskripzioa urtarrilaren 16etik otsailaren 3ra bitartean internetez www.kirolprobak.com web orriaren bitartez.

7.- Prezioa: Kuota 68€koa izango da “Txip horia” dutenentzat eta 70€koa “txip horia” ez dutenentzat. Zenbateko honek zera bermatzen dute: proban parte hartzeko eskubidea, erantzukizun zibileko asegurua eta ezbeharretakoa, antolakuntzak parte-hartzaileentzako atondutako zerbitzuak erabiltzeko eskubidea, oroigarri bat eta antolakuntzak probarako lor ditzakeen sarien zozketan parte hartzeko aukera.

8.- Seinaleztapena: Ibilbidea behar bezala seinaleztatuta egongo da, kartel adierazleekin eta ageriko baliza-zintekin. Kilometro-erreferentziak ibilbide osoan zehar jarriko dira.

9.- Kontrolak: Probaren luze-zabalean antolakuntzak 13 kontrol-gune jarri ditu eta berauetatik pasatzea ezinbestekoa izango da, gune hauetan egingo baitira erregelamenduzko igarotze-kontrolak.

10.- Hornidura: 13 postu atonduko dira helmugakoaz gain. Postu hauetan produktu energetiko eta freskagarriak eskainiko zaizkie parte-hartzaileei (ura, fruta, barrak, edari energetikoak e.a.).

11.- Igarotze denborak: Korrikalariek, gehienez ere, 8 ordu izango dituzte helmugara iristeko eta, hau horrela, denbora gainditzen duten parte-hartzaileek behin-betiko sailkapenean agertzeko aukera oro galduko dute.

Edonola ere, antolakuntzako arduradunek korrikalariak probatik baztertzeko ahalmena izango dute ondorengo kasu hauetan: igarotze-kontrol ezberdinetan egitea espero den denborak betetzen ez dituztenean, probako arauak hausten dituztenean, ezarritako ibilbideari zehatz-mehatz lotzen ez zaizkionean, erregelamenduzko dortsala ondo ikusteko moduan ez daramatenean, antolatzaileek esandakoari jaramonik egiten ez diotenean edota gainontzeko korrikalariekiko kiroltasunez jokatzen ez dutenean. Xede hauetarako, probaren amaiera adieraziko duten bi korrikalariren parte-hartzea aurreikusten du antolakuntzak. Baztertua edo kanporatua den parte-hartzaile orok gertuen duen kontrol gunean eman beharko du bere dortsala eta antolatzaileek agindu bezala utzi beharko du proba.

12.- Sariak:

Gizonezko Absolutuak :

 Txapela, garaikurra eta 1200 € eskudirutan
 Garaikurra eta 600 € eskudirutan.
 Garaikurra eta 300 € eskudirutan .
 150 € eskudirutan.
 100 € eskudirutan.

Gizonezko Beteranoak:

 Txapela eta garaikurra.
 Garaikurra.
 Garaikurra.

Gizonezko Euskalduna:

 Garaikurra eta bi lagunentzako otordua.

Emakumezko Absolutuak

 Txapela, garaikurra eta 1200 € eskudirutan.
 Garaikurra eta 600 € eskudirutan.
 Garaikurra eta 300 € eskudirutan.
 150 € eskudirutan.
 100 € eskudirutan.

Emakumezko Beteranak:

 Txapela eta garaikurra.
 Garaikurra.
 Garaikurra.

Emakumezko Euskalduna:

 Garaikurra eta bi lagunentzako otordua.

Korrikalari helduenari:

Garaikurra

Zegamako lehenengoarentzat:

 Txapela eta garaikurra

Gainera, proba ezarritako denboran amaitzen duten parte-hartzaile guztiek bertako produktu sorta bat jasoko dute.

13.- Sailkapenak: Sailkatzen diren korrikalari guztiek puntuatuko dute Skyrunner World Series 2017rako.

14.- Bilera informatiboa: Antolakuntzak probaren iraganbide ezberdinei buruzko informazio topografikoa eta antolaketari buruzko xehetasun garrantzitsuenak ezagutarazi eta eskainiko ditu aurkezpen bilera batean. Aurkezpena Zegamako Eskolako gimnasioan egingo da proba ospatu bezperan, hau da, 2017eko maiatzaren 27an, arratsaldeko 18:00etan. Oso garrantzitsua da parte-hartzaileak bilera honetara hurbiltzea.

15.- Dortsalen banaketa: Dortsalak Herri Eskolako gimnasioan banatuko dira, 2017ko maiatzaren 27an, arratsaldeko 17:00etatik 20:00ak bitartean. Maiatzaren 28an bertan berriz, goizeko 7:00etatik 8:00etara banatuko dira elizako arkupetan.

16.- Ingurumena: Lasterketa, bere zatirik handienean, edertasun natural handiko parajeetatik igarotzen da eta, hau horrela, ingurunea ahal beste zaintzeko eta zaborrak kontrol-guneetatik kanpora ez botatzeko eskatuko zaie partehartzaile guztiei. Xede horrekin zabor-kontenedoreak ere ezarriko dira kontrol-guneetatik 100 metroko distantzia arte.

Oinarri-oinarrizko arau hau betetzen ez duen korrikalari oro probatik kanpora utzi ahal izango da.

17.- Osasun-Laguntza: Antolakuntzak sorospen- eta salbamendu-zerbitzuak atonduko ditu ibilbideko puntu estrategikoenetan. Era berean masaje-zerbitzuak, dutxak, komuna eta aparteko beharren bat duten edota ondoezak jota iristen diren kirolariei aurreneko laguntza emango dieten medikuak ere izango dira helmugan.

18.- Segurtasuna: Antolakuntzak, aurretik Lasterketako Batzordearekin hala adostuz gero, proba ordezko ibilbidetik desbideratzeko, beharrezkotzat jotzen dituen aldaketak egiteko eta, eguraldiak hala eskatzen badu, maratoia bertan behera uzteko eskubide osoa izango du.

19.- Laguntza ezbeharretan: Parte-hartzaileek betekizun izango dute istripuren bat izan duen edonor laguntzea eta kontrol-guneetan edozein ezbeharren berri ematea.

20.- Erantzunkizuna: Antolakuntzak erantzukizun oro ukatuko du istripuren bat gertatuz gero edota zabarkeriaz jokatzen bada; eta baita parte-hartzaileen objektu pertsonalei dagokienean ere, xede horrekin kontsigna-zerbitzu bat izango baita helmugan bertan. Horrela bada, parte-hartzaileek izango dute euren buruari edota hirugarren pertsonei eragindako kalte ororen erantzukizuna.

21.- Zira eramateko obligazioa: ISF Federazioak, lasterketan dauden denboran zira bat eramatea derrigortzen du partehartzaile guztiei.